الأحد، 28 نوفمبر 2010

Bath &Body Works _Dark Kiss_


ذاك اليوم رحت المارينا ومريت

Bath &Body Works

يصير يم ماك والله ماهقيته جذي كبير عبالي صغير حيل.. عااد ماادري اي واحد اكبر الي بالمارينا او الي بالافنيوز لان للحين ماشفت الي بالافنيوز

مابقى شي ماشميته وكالعاده كفخت الريحه براسي وقمت ما اميز!
قتله  ابي اخر مجموعه نزلت عندكم
جان يقولي اخر شي نزل اهوا ال

dark kiss

واول ماتدخلون راح تلقون المجموعه مرتزه بويهكم



خذيت الشور جل+كريم للجسم+الشمعه+مرطب للشفايف+الليفه
كلهم ب18

وقتله غلفهم لي

حطهم لي بجييس لان البوكس البنفسجي مال المجموعه مخلص من عندهم

انا عبالي مجموعه ال dark kiss صج يديده ،اثاري نازله بره من سنه الطواعين يمكن من شهر 5 او قبل

بس ترى المجموعه حلوة واهيا الي ريحتها ميزتها عن باجي المجموعات
احلى شي عقب ماتاخذون شور وتشبون الشمعه وبعدها نووم عميق ..مو تنسون اطفونها قبل لا اتنامون عااد حزتها بتصيرون صج dark :P

الأربعاء، 24 نوفمبر 2010

الصابون المعطر من CHANEL

مرحبااا

من اسبوعين رورو دزتلي  صورة صابون شانيل كانوا حاطينه بمجله
وكنت باخذه من معرض العطور بس ماكانوا نازلين المعرض


وامس رحت فافافوم
وخذيته



عباره عن علبه وفيها 3 بابونات


الي يحب عطورات شانيل راح تعجبه ريحتها
سعر العلبه ب17 دينار

الجمعة، 19 نوفمبر 2010

تاج بس قديم شوي

قبل جم شهر كانت رورو دازتلي تاج بس ماحليته ماانتبهت عليه


والحين بحله




ماذا ستكتب لنا لتعبر عن حياتك التي عشتها إلى الآن في كلمات قليلة ؟


دوام اكل ونوم ونت وجمعية وسوق وصالون وحواي وصيدليه ماكو شي مميز روتين ممل

من ستختار ليمسح دموعك ؟

امسحها بروحي



لو خيروك بين حبيبك وبين اعز صديق فمن تختار ؟



الصداقه اهم ..الحبيب مو مضمون



من يسكن قلبك؟



فاضي


هل تعتقد أن حظك سيئ؟



وليي يعني لازم اتذكروني بهالشي :P



.هل هزمك حزنك في يوما من الأيام؟



لا مو لي هالدرجه



.((مستحيل أنساك)) لمن تقولها ؟



ولد عمي و ولد خالتي الله يرحمهم


.(( اللي راح راح وما تفيد كلمة ياريت ))

إذا أردت أن توجه هذه العبارة لنفسك, فماذا تقصد بها ؟

عن كل الاغلاط الي سويتها بحياتي احاول استفيد منها ومااكررها




.(( أنت كل شيء بحياتي )) لمن تقولها ؟



اهلي (امي ابوي خواتي واخوي)



متى أخر مره بكيت؟


من زمان مااذكر متى


أي الدول تتمنى أن تزورها ؟



هاواي



هل لديك الجرأة أن تقول عمرك أمامنا ؟



25 سنه


هل أنت راضي عن نفسك ؟



الحمدلله



هل تؤيد الزواج العاطفي أم الزواج التقليدي ؟ ولماذا ؟



ماادري شنو الله كاتب



ايهما أهم شهادتك الجامعية أم الزواج ممن تحب ؟

الشهاده




.هل تعترف بشيء اسمه الصداقة بين الرجل والمرأة ؟

ماادري ما اعتقد تضبط  بالله شبسولف معاه فيه مكياج ولا حف ولا سوق!





.هل أنت مدمن تفكير؟



اي





.من هو أكثر شخص تفكر فيه؟



مافي احد معين




 

إذا تم تعيينك ملكا لجميع البلاد العربية فما أول قرار ستتخذه ؟

ارفض بشده
مالي خلق اضيع وقتي..عرب مامنهم رجى


.هل تكره شخص بشده في حياتك ؟



لا

هل ملابس الشخص أمامك تؤثر فيك لتأخذ عنه انطباع ؟؟



بعض المرات اي

ما الذي يلفت انتباهك بسرعة في الشخص لكي تعجب به ؟



الاسلوب والشخصية والجسم الحلو يعجبني



إذا أحببت شخصا في الوقت الخطأ وفي المكان الخطأ فماذا تفعل ؟؟


سوات الله أبرك :P


.حكمة تؤمن بها جدا؟؟



ابتسم رغم كل الالم





.عاده تفعلها دائما تتمنى أن تتركها ؟


انتف شفايفي


ما هو أجمل اسم لولد وأجمل اسم لبنت من وجهة نظرك؟



محمد وعبدالله
والبنات مافي اسم معين



.ماذا تفعل أول شيء إذا ربحت مليون ؟



مااخذهم لان ادري بالغلط

.هل أنت من لديهم رغبة حب التملك وإذا تملك الشيء أصابه الملل منه ؟



اي بعض المرات تصير فيني احن على شغله ومن تصير عندي امل منها


.اعتذار تريد أن تقدمه لمن؟



مممم ماكو شخص معين بس اذا غلطت على احد اقوله  أنا اسفه



لمن تهدي هذا التاج من بعدك ؟
هذا التاج قديم ويمكن اغلبكم حاله..بس اذا في احد من الي ضايفتهم مو حاله اتمنى ان يحله وشكرا J

الثلاثاء، 16 نوفمبر 2010

المنديل العجيب




حق الي يدورونه لقيته بجمعية كيفان تحت

حاطينه بستاند يم المكتبه

اهوا يستخدم للعباه وأي خام اسود


العلبه  فيها 5 ب770 فلس

الاثنين، 15 نوفمبر 2010

عيدكمـ مباركـ

كل عام وانتوا بخيير

تقبل الله طاعتكم

وان شاء الله تكتمل فرحتنا برده الحجاج



يقولون الخرفان زادت اسعارها
عاد بنت اختي الصغيره سوت لنا خروف وبنذبحه باجر :P



الأحد، 14 نوفمبر 2010

واجبات تدوينية_المواقع المفضله+اعترافات_

مرحبا


الحين بحل لكم الواجبات الي دزتلي ياهم رورو

كبرنا عالواجبات :P


السؤال الاول: من ارسل لك الدعوة؟


trendygirl


السؤال الثاني ماهي المواقع المفضله لديك وتزورها باستمرار؟ضع رابطها وماتستفيده منها؟

google
youtube
منتديات خاصه للبنات
بلوقي واحوس في البلوقات الثانية
الفيس بوك احيانا
الهوتميل
الياهو

السؤال الثالث حول الواجب الي 5 مدونين؟

Gold Medal Ribbon

Crazy Yet Wise

dodoq8

تخاريف طموحة

Q8 DreamEr

Would Life be Fair ?


الواجب الثاني

كرسي الاعتراف

اعترف اني مملوحة ودمي خفيف :P  لوول شعترف فيه مممممممم

- اعترف ان وجود اهلي مهم بحياتي ومااقدر اتحمل المسئولية.
- اعترف اني اخاف من السواقه بس لازم اسوق.
- اعترف اني مااحب دوامي!
- اعترف ان حظي ردي.
-  اعترف ان بعض المرات اعطي ناس ويه واهما اساسا مو كفو.
- اعترف ان وصل الطلب وبروح اتعشى :P


رورو تقولين ان دزيتيلي واجب وماحليته شنو اهوا الواجب ؟




الجمعة، 12 نوفمبر 2010

Beauty Seeds

مرحبا

من فتره رورو قالتلي ان جايونة دزتلها ايميل عن  منتجات طبيعية  اسمها

Beauty Seeds

عباره عن سنفرات وصابون طبيعي 100%

وطبعا رورو غرامها السنفرات وهالسوالف :P
شيشتني وقلنا خل نطلب


وهذي صوره للطلب كله

كان واايد حلو ويصلح ادزونه كهدية


_ خلطه تقشير الشفايف هووليود لبس
السعر بدينار

جربتها عجبتني وتعطي لون وردي حلو


_ خلطة صابون (بلودي مرايم)
طلبت الحجم الصغير 3.500
للحين ماجربتها


_ صابونة كوتون كاندي
جربتها الريحه حلوة بس لعوزتني بالاستخدام ..لازم احطها بايدي وافركها ومااستخدم الليفه


_ خلطه يمي كريم للحين ماجربتها
والحجم الصغير 3،500



_  خلطة تروبيكال مانجو
الحجم الصغير ب3،500


_ خلطة الفيري دست واايد حلوة ريحتها يايه على حلاو اكثر
الحجم الصغير ب3،500



تحصلونهم بالفيس بوك

http://www.facebook.com/group.php?gid=153399774682863

الاثنين، 8 نوفمبر 2010

معرض العطور

مرحبا

اليوم الصبح رحت معرض العطور مالقيت احد يروح معاي جان اخذ بنت اختي الصغيره صج انها لعوزتني بس سلتني بالطريج


خذيت ماسكرا cat walk ب4 وشي


 من بودي سنتر مجموعه النرجس بس الشور جل والعطر بعشره


من ماركه SLA  اول مره اخذ منها..  خذيت  فونديشن والكومباكت بودر مسوين خصم اثنينهم ب8وربع
جربت الفونديشن حلو خفيف يصلح للبشره الي مافيها عيوب




ورحت قسم حنان دشتي اول ماقربت كلهم لابسين تايقر خفت والله لا ينهشوني انا وبنت اختي :p

خذيت الكونسيلر منهم ب5


ومسوين عرض 5 شدوات بعشره



و3 حمر هم بعشر دنانير


ومن نيفيا الصبغ الواحد بدينار



ومن بيضون عطر لاختي مسوين تنزيلات



وللبيت من دكان البخور معمول المعجون السلطاني على 5 وشويه بخور ان شاء الله يعجبهم



ومن الطارش لاختي الثانية مجموعه فيها عطر وبخور ودهن عود ب18


ونسيت اروح لاش قايله يعني بخليه اخر شي :S

السبت، 6 نوفمبر 2010

Trust Saving Card

مرحبا


الاسبوع الي طاف مااادري الي قبله!

وصلتني بطاقه (ترست)

اهيا عباره عن بطاقه توفير تقدم لكم خصومات وكوبونات مجانية



هني من داخل


هذي شكل البطاقه




وهذول الكوبونات المجانية تبتدي قيمتها من دينار ونص لي 120 دينار


بعض الشركات والمحلات المشاركه بالكوبونات:
- فلورنسا كافيه.
- بينت بول الكويت.
- الشايجي للاثاث والمفروشات.
- مركز الضمان الفحص الفني للسيارات.
- فردين للنظارات.
- مركز المباركية لطب الاسنان.
- ابتسامه كلينك
- ناتشرال كير.
- معهد وصالون البدر للتجميل.
- صالون هلا بيور.
- صالون ديفاز للسيدات.
- صالون بيربل ديزاين.
- صالون فلورنسا للتجميل.
- صالون مايسترو كت للرجال.
- معهد جرين ابل للسيدات.
- معهد تاي مساج التايلندي.
- صالون فاطمه قبازرد.

وغيرههم تلقونهم بهاللنك




وبهالكتيب يبين لكم الشركات والمحلات والمطاعم  والعيادات والفنادق ...الخ  المشاركه بالخصومات





وهذا سايتهم راح يفيدكم اكثر



البطاقه سعرها
20 دينار