الاثنين، 17 أغسطس، 2009

تجربتي لكحل الأثمد

السلام عليكم ورحمة الله وبركاااته
اول شي حابه اقول عظم الله اجوركم لضحايا حادثه الجهراء
قال رسول الله صلى الله عليه وسلم:
ان لله تعالى ماأخذ، وله ما اعطى ،وكل شيء عنده باجل
نسأل الله الرحمة والمغفره لروحهم.. والصبر والسلوان لذويهم
والحين ندخل بالموضوع..من فتره وانا ماادري شفيني طاق ابالي ابي رموشي تصير طويله بس مو عارفه شلون!
وانا احوس بالمنتدى لقيت وحده عارضه منتج عباره عن زيوت لتطويل وتكثيف الرموش وحاطه تجارب البنات ومشالله كل وحده تمدح بالزيت والنتيجه الي حصلت عليها..جان اقوم واطلب منها هالمنتج واستمريت عليه لمده اسبوع وصج حسيت بفرق بالطول شي بسيط ..واستمريت عليه بس بصراحه ماكنت احطه بصفه يوميه ..
ومن بعدها هم وحده حطت عن جل للحواجب والرموش ماادري اذا تعرفونه اسمه اكرينال وحفظت اسمه عشان اذا رحت الصيدليه آخذه ،جان تقولي اختي ليش تشترينه كاهو عندي ومااستخدمته الا مرتين جنه..خذيته منها وقمت استخدمه وكالعاده اولها اشتط واحطه باليوم مرتين وبعدها قمت احطه بالاسبوع مره :s
المهم ذاك اليوم قريت موضوع عن المستحضرات الي اطول واتكثف الرموش وكاتبين ان اغلبها مضرة للعين الي اتسبب حول والي تسبب ضعف والي ماادري شتسوي..قلت لا يحوشك بروح النظر الله بالخير هالدور بعد حوله :s

قلت انا شالله حادني ليش ماانرد عالطبيعه وعلى سنه رسولنا على الصلاه والسلام منها أجر ومنها استفاده يالله من فضلك ..

واتذكر ان خالتي يزااها الله خير يابتلي من السعودية كحل اثمد واقوم آخذلي شويه واخلطه بالماي واحطه على رموشي وشويه داخل عيني(ترى اذا دخل بالعيون يحرق بس عادي لاتخافون ما منه مضره) بس عيبه الي من المدينه ان لما اتحطونه يتناثر ما يثبت..وذاك اليوم اختي يابت كحل اثمد من الحواي(حواي القادسيه) ولت عنده واحد اسود والثاني احمر..الاحمر يستخدمونه الرياييل اكثر لان مافي لون اما الأسود الحريم يحبون يستخدمونه لان في لون اسود ويصير مثل الكحل..

ويتني اختي جان تقول ترى جربت الي من الحواي وحلو مايتناثر مثل الي عندج..وقتلها دامج مدحتي المره الثانيه لما تروحين ييبيلي منه :P

وماقصرت اخيتي يابتلي منه وخلطت شويه من مال المدينه وشويه من مال الحواي وقمت استخدمه والحين من بعد هالقرقه أخيرا بكتب النتيجه الي شفتها :P
..

1_ طلعتلي رموش يديده :d
2_ الطول حسيت بشي بسيط مو وايد بس لما احط الماسكرا يوصلون لي حواجبي.
3_ انا البس عدسات طبيه كل يوم لان نظري ضعيف ومااحب البس نظارات وتعرفون ان العدسات تسبب جفاف بس مع استخدامي للكحل الاثمد الجفاف خف حتى بياض عيني ردت له اللمعه الطبيعيه مو مثل قبل ناشف .

وبس هذي النتايج الي حصلت عليها من استخدامي للاثمد انا بعد قريت ان يقوي النظر بس يبيله استمرار انا الحين صارلي شهر وشوي بس للامانه مو كل يوم احطه..

وهذي صورهم الي عاليمين اهوا الي من الحواي والي عاليسار مال المدينه



هناك 9 تعليقات:

رورو الشخبوطه يقول...

السلام عليكم..

اجرنا واجرج يارب..

وامين يارب..

ماشاءالله شوقتيني عليه..

وماقصرت اخيتج تعيش وتيب لج يارب وتجهزج عروسه يارب :)

مشكوره ..

Angel Orchid يقول...

اجرنا واجرج حبيبتي
ومشكورة على كتابة تجربتج :)

Made n Q8 يقول...

رورو الشخبوطه+Angel Orchid

العفو ولو حيااكم الله

Chiwiti يقول...

Hii
TakE a loOk at our blOg you might like somethinG sInce you LikE FashiOn :)

daloo3a يقول...

والله كشخه عيل بنستخدمه

تسلمييين ع الموضوع ^^

Fishah يقول...

ماجربته

هالايام امبيه حتى كحل ما احط :<

على يوم بقلدج :)) عليج بالعافيه :>

Made n Q8 يقول...

Chiwiti+daloo3a+Fishah

حيااكم الله ويسلموو عالمرور

Ļa ƒéммé يقول...

بصراحه حيل خاطري اجربه وحيل مادحيلي النوع اللي ينباع بصيدليه النهدي مكه وللأسف رحت الصيدليه ونسيت إن شاء الله المره اليايه ومشكوره على الإفاده بتجربتج :)

غير معرف يقول...

ههه طريقة كلامك مضحكة اختي��الله يحفظك