الأربعاء، 19 مايو 2010

مستشفى الأميري!

مرحبا
أخبااركمـــ؟
حبيت انقل لكم المواقف والاحداث الي صارت معاي بالاميري طول الاسبوعين الي فاتوا
طبعا مواقف تضحك وتبجي وتبط الجبد!!
اول موقف مر علي الي اهوا الاصنصير ! حبايبي ليش ادزون؟ اوكي ترى الاصنصير كبيير مالا داعي ادزني حتى لو انت كبر يدي بس هم عييب ..خلصنا من الدز انيي عاد حق الخز يعني لو اقوله جم مقاس شسمه بيعطيني ياه على طوول !
ثاني شي اليهال ليش اتييبونهم حرام الياهل يمل بسرعه و هذا اصلا مكان مرضي المفروض يكون راحه مو تشوت كره بالممر..تخيلوا في ياهل يشوت الكره على ابوي!! بالله ابوي وين في حيل يلعب طمباخيه بروح ملزقين قلبه تلزق.
وثالث شغله في غرفه الانتظار مالت العمليات تشوفون الهوايل والبجي بصووت عالي والي يصرخ والي حالته حاله..اوكي ماتنلامون خايفين على مرضاكم بس ترى لو تمسكون لكم قرآن او ادعيه تقرونها لمرضاكم واايد احسن.
وامس رحت مع رفيجتي الاميري كانت تعبانه المهم نبي رقم قال لا ماكو ارقام دشي وبس! الحين ارقام وبالدور والناس تتهاوش شلون بدون ارقام؟
ولا واعليا رفيجتي قلبها ريال خخخ تقوله اسمي فلانه يكتب عمر تقوله اخوي كاتب اسمي غلط جان يشطب الاسم بكبره ويكتب أنور كاااااااك..دخلنا عالدكتور حده منصدم الاسم انور والشكل بعييد حده عن انور خخخ
المهم كتبلها على ابره وقالها قبل خل ياخذولج حراره ..قعدنا ندوور ونتوسل اي احد بس عشان يسويلها الحراره مابقى غرفه مادخلناها..واخيرا خذولها الحراره والحين بدى مشوار العذاب الآخر والي اهيا الابره ونفس الشي مابقى احد ماسالناه المهم دلونا عالغرفه الي يعطون فيها الابره وااي لأ الغرفه سبييل الكل يدخل ويطلع ..الابره لازم تاخذها على كوكتها لو ايدها قلنا اوكي يمشي الحال المهم رفيجتي طنقرت طلعتهم كلهم وقفلت الباب خخخ
والي صج عورت قلبي وحده كبيره بالعمر شكلها بتموت وماسكه قلبها حييل ولدها ياي ويقول امي تعبانة احتمال جلطه والسستر ترد بكل برود مو مشكله خل يصبر شويه@@
وبس سلاامتكم :s

هناك 12 تعليقًا:

غير معرف يقول...

yaaaaaaaaaaaa kerh mostashfayat el7okoma wel awadem elli yeshtaghloooon feha!!!! 9ij nas ma3ndehm galb wala ra7ma!!! 3ama b3enhom!

كوكتيل يقول...

عزيزتي هذي المستشفيات الحكوميه إبداع يومي يتجدد

أنا مرة رايحة مع جارتنا وقالها سوي أشعه وبعدين قالها أنا تغير شفتي وراحت سوت الأشعة وردت لقينا دكتور ثاني قالها أبي أشعه روحو وتعالو عقب تبي تقوله سويت ما عطاها فرصه جان أشخله عدل قلتاه صبر شوي أسمع أول توه زميلك قايلها سوي أشعه لأن الأخ بدأ يصارخ لازم لازم أشعه لايطيح نصك ياالغالي :)

رورو الشخبوطه يقول...

واي شكو يدز جان رفستيه ..

والخز بذمتهم كيفهم :p احنا اللي علينا سويناه تذكرت جميلة الجميلات خخخ..

والمستشفى بكبره مو بيئة مناسبه لليهال كله امراض وبياذون المرضى بازعاجهم ..

وسلامة قلبه اونكل شخباره الحين ؟؟

و اي ماله داعي هالافلام يخرعون اللي مايخترع وبدون فايده ..

سلامتها وي هذا اصمخ ولا اهبل ولا شنو بالضبط جان كتبتوا اسمه بالورقه وقلتوله اخوي انت المفروض تتعالج :\

وي خوش فيلم مو ابره وعسى طلعتي انتي ماجابلتيها خخخ..

وعليه عسى صبرت سليحط :\

وانا ريل خالتي في مرض الشين الله يشفيه ويكفينا شره راح المستشفى قالوله مافي مكان حقك !!

ومرسي..

شاي الضحى يقول...

حمدي ربج الاميري احسن من مستشفيات وااااااايد

انا من ادش ما اتعب نفسي اعطي الهندي ربع دينار ويسويلي كل شي وانا قاعده بمكاني

بس ادش على الدكتور وبعدها اقعد واهوا اييب الادويه ويخلص شغلي

ومره كنت رايحه على الساعه 12 بليل وتعبانه مرتفعه حرارتي نقول لهم بس قيسوا الحراره كل وحده تقول ماعندي حراره !!

مستشفى شكبره مافيه حراره

جان اروح المستوصف وقست حرارتي ودشيت على الدكتور احسن من المستشفى واسرع

ما تشوفون شر :)

Made n Q8 يقول...

crazyyetwise.com

اظاهر ماتت قلوبهم من الي يشوفونه من جذي ماعاد يهمهم لول

Made n Q8 يقول...

كوكتيل

وي بسم الله هذا توه مبلش زامه جذي نارر عيل لو مار عليه ساعه شسوي!

Made n Q8 يقول...

رورو

لا بالاصنصير اخاف ارفسه لوول

جميله الجميلات منو ذكريني؟ :d
ليكون انا بعد عمري :P

قلب اونكل صار كويس الحين بس حب امي اظاهر متعبه شوي كااك

الاخ مبين كان يتسهبل يعني في بنت اسمها عمر ولا انور!

لا والله ماخلتني كنت بقعد اطمش بس جحتتني معاهم :s

سلامته ان شاء الله ريل اختج ..شنو الي مافي مكان شنو اهوا داش فندق خو يبي يتعالج امبييه صرنا مصر!

Made n Q8 يقول...

جايونة

يقولون العدان ابداعاتهم اكثر بس اشوه مو صوبنا

والله خوش فكره بسويها وافك عمري خخخخ

وعسى ماسوولج الحرارة بالممر ترى عادي يسوونها ؟!

والشر ماييج يارب

Engineer A يقول...

اتصدقين ؟؟

انا بروحه قلبي متروس منهم ودي انفجر بس عليهم مو قصدي بس على الأميري لا على اشياء وايد بالديرة ماشية غلط وآن الأوان انها تتعدل!!

تنرفزت من صجي اتوقع ضغطي صار 1000 .. ودي اتلكم بس شاقول؟؟

خليها على الله!

Made n Q8 يقول...

engineer a

لا وي اسم الله عليج قولي لا اتحطين بقلبج مو زين

غير معرف يقول...

والله ما أقول الا مالت على اللي ماسك المستشفى. صج حريتي قلبي :@

Made n Q8 يقول...

hopeless sight

سلامتج من الحره :)