سوق الديرة(سرداب الشايع)

مرررحبــــــــــــا

عيدكم مبـــــــــــارك

وكــــــل عــام وأنتوا بخـــــــير

امس انا واختي متفقين على ان نروح الافنيوز وجمعيه الروضه لان مسوين عروض بمركز التجميل مالهم بس انا كشت فيها ونمت ..مع انها المسكينه يت قعدتني بس ماكان فيني حيل:s

المهم صليت العصر ورديت انسدحت جان تقولي شنو بتنامين بعد!

قتلها بعد وين فيه مجال نطلع جان تقول امشي لولو هايبر ..قتلها خلج من لولو هايبر وخل نروح سوق الديرة من زمان عنه :d

طلعنا من البيت الساعه 4 العصر وتوقعت ان المكان زحمه بس اشوه كانت المواقف شبه فاضيه والناس شويه بس بعدين عقب الفطور قامت الناس تزيد..

دخلنا السوق وعلى طول على سرداب الشايع

وهذي مشترياتي

خذيتلي لوشن ماجيك +كريم ماكسي بيل للتقشير والتفتيح(انا قبل مستخدمه الصابونة مالته وهم نفس الشي تفتح وتقشر)

وكحل محمود سعيد+ماسكرا مكياج الفاشله خخ+ لمعه ماركه مكياج

بلاشر من كفر اب+لمعه الفازلين او الماي من شارمل ..اول ما حطيتها حطيت واايد وااي احس ويهي مدبق لوول بس بعدين حطيت شويه بطرف صبعي طلعت حلوة

بودرة لتبييض الاسنان ..تحطونها مع المعجون تبيض وتعطي ريحه حلوة عاد اول مابطلتها هفت علي ريحه دارسين اظاهر من مكوناتها الدراسين

شور جل 2 في 1 يقشر ويرطب للحين ماجربته

وصابونة من ماركه سكن وايت واللوشن مالها

ونوعين من كلونيا جونسون هذول ما احصلهم بكل مكان

وهذا كان فطوري :)

وحيااكم الله :)

LOVE ETC من بودي شوب+ JOVAN BLACK MUSK

مرحبااااااااااااااااا

صباح المسك والعطور وقرقه البنات الي معاي بالدوام صكوا راسي :S

حبيت اقولكم عن عطر من بودي شوب اسمه LOVE ETC

يوم الخميس رحت جمعيه الدعية وقلت مابي ادخل بودي شوب لان اذا دخلت بقعد اخمط اشياء مالها داعي ..وانا ماره والا الي يشتغل يقول شمي هالعطر اليديد المهم شميته ومااهتميت،وبعدين وانا امشي تهف علي ريحه عجيبه يايه على نظافه وانتعاش حزتها استوعبت انها ريحه العطر الي من بودي شوب..رجعت فوق وخذيت العطر مع الشور الجل

اهيا مجموعه كامله وهذي صورتهم من النت

وهذي صورة العطر مع الشور جل

العطر ب12

والشور جل ب 3 وشي

وحبيت بعد اتكلم عن عطر جوفان المسك الاسود هذا مخصوص حق الي يحبون ريحه المسك ..

الي خذيته اهوا اليديد وهذي صورته

وفي الي اقدم منه،عاد لما شميته طرت علي ريحه الفلبن يحليلهم اثاريهم طايحين بهالعطر خخ

بس انا خذيت اليديد سعره تقريبا 3 وشي ..وبعد بغيت اقول عن شغله اذا حابين تثبتون ريحه المسك بجسمكم

تحتاجون مسك تحصلونه عند القرشي تبشرونه وتحطونه في بخاخ (البخاخ تحصلونه عنه بو 100) وتصبون عليه ماي ورد تنقعونه لمده يوم وبعدين عاد لما تسبحون تنشفون جسمكم عدل وترشون منه وتلبسون هدومكم وترشون من عطر جوفان..بجذي راح تظل ريحه المسك على جسمكم لي السبحه اليايه ..انا حطيت معاه شويه من بودره دم الغزال عشان اصير ورديه ..طل لوول

وحياااكم الله ;)

رشــاش صـلاح الديـن!!

مرررحــبا

أخبااركم؟

اليوم وانا قاعده اتصفح الجرائد الاعلانية شفت اعلان عن لعبه للاطفال اسمها رشاش صلااح الدين!

اول شي حبيت اقوله من متى صلاح الدين كان عنده رشاش؟ انا خابره على أيامهم يحاربون بالسيوف ،خناجر، أسهم يعني اسلحتهم على قدهم بس رشاش ماسمعت كلش..

بس كسروا خاطري عيالنا بخربون برائتهم ..يعلمونهم عالارهاب وذبح مذابح وأهم شي شكل الرشاش يخوف ولونه اسود جنه صجي،عالاقل خلوه ملون حطوا عليه رسومات عشان يبين انه حق طفل!

وبالاخير بس حبيت انصح الي مسوي هاللعبه واقوله لو مسويلك كتيب صغير تحط فيه بطولات صلاح الدين مع صور توضيحيه ويكون الكلام فيه مختصر عشان يقدر يستوعبها الياهل احسن وايد من هالرشاش

وهذي اهيا صورة اللعبه

وحيااكم :)

الجزء الثاني(المعرض السوري_معرض الهدايا_معرض الكتاب)

مرررررحبــــــــــــــــــــــــــــــــــــــا

أخبااركمـــــــــــــــــــــــ؟ـــ

امس كانت رحلتي الثانية لارض المعارض انا واختي واحنا قايلين من اول..ان اول شي نروح معرض الكتاب ولي خلصنا نمر عالهدايا..طبعا الكلام كله انعكس :s

اول مادخلنا البوابه جان اقول دام احنا قريبين يم المعرض السوري خل ندخل ناخذ الحلاو خلصنا من الحلاو جان اختي توقف عند الي يبيعون ادوات الي يزينون فيها السلطه وهالسوالف وخذت منهم بس ماصورتهم وهم خذت حق امي الي يحطونها فوق ورق العنب عشان لا يتبطل ماعرف شسمها بس صورتها لكم تحت

ومع السوالف لقينا نفسها داخل معرض الهدايا :d

وشفت هالجنطه ماادري على أي اساس خذيتها لما رجعت البيت تحسفت

وخذيتلي هالاساور عجبوني

وقمنا نحوس ونحوس لما صارت الساعه 12 ونص @@

وين يمدينا نفتر بمعرض الكتاب!! بس هم رحنا وحللنا النص الساعه خخ

وخذيتلي هالكتب... الي عاليسار حق جوجو ولا طلع للي اعمارهم من 6 لي 8 سنين واهيا عمرها 4 سنين خخخ

الكتب الي عن الجرجير والكيك ملوت اختي

وبالاخير سكرنا الصاله وطلعنا مع الموظفين خخ

وسلاامتكم

معرض الهداايا :)

مرررحبــــــــــــــــا

أخباااركـــــــــــــــــــــمـ؟

الله يسلمكم يوم الخميس الي طاف خذيت خروجية من الدوام الدعله ورحت انا واختي لمعرض الهدايا ..انا قلت الحين بنروح وبنلاقيه فاضي ولا مشالله زحمه مالكم محطه ريل ،المهم صفطنا ولا نقرى مكتوب فوق الصاله المعرض السوري قلنا خل ندش دام ان قريب .. افترينا فيه ولا كله خلاجين وخماجير سوريا ماعجبنا الوضع بس اختي خذت منهم الحلاو مالهم





طلعنا من المعرض السوري ورحنا لمعرض الهدايا طبعا الي متعود يروح معرض الهدايا كل سنه راح يعرف ان هذا سيفوه وهذا خلاجينه ماكو شي يديد بس لازم حريم نحب التطمش...بس الي عجبني محلين صايرين يم بعض يبيعون اساور شغل لبنان واسعارهم واايد مناسبه ،شوفوا الصورتين الي تحت الاساور طلع مجموعهم 11 دينار

واختي خذت لعبه حق فطامي اول شي استانست عليها قامت تخمطها آخر شي خافت منها الحمدالله والشكر

وهذول اشكالهم عجبوني حتى ملمسهم جنهم صج الوحده على دينار،وبعد خذيتلي صابون من بوعبد بانافع بس ماصورتهم

هذي اهيا مشترياتي البسيطه من معرض الهدايا على فكره ترى مددوه لي 5_11 آخر يوم يوم الخميس الياي ..انا ان شاء الله لي روحه لمعرض الكتاب لان ما مداني ذيك المره سكروا الليتات واحنا بالمعرض يعني استحوا على ويهكم وطلعوا خخ

والملتقى ان شاء الله بمشتريات من معرض الكتااب :)

حنيت على هالصابون التونسي واخيرا لقيته بجمعية الشامية :)

مرررحبااااااااااااا

أخباركمـــــــــــــــــــــــــــــــــ؟

ماادري اقول مبارك عليكم الشهر ولا عيدكم مبارك ..ادري اني مقصرة وادري انكم فقدتوني بس شسوي اشغال هالدنيا :P

المهم مالكم بالطويله..

من فترة كتبوا بكذا منتدى عن صابون اسمه (صابون بلدي تونسي للعرائس) وانا من شفته تولعت فيه خخخ ،واشوه في وحده نزلت موضوع بمنتدى كويتيات ان هالصابون متوافر في جمعية الشامية والسالمية(هذا الي اذكره) وقريبا بالقادسية ..

وطبعا شريفه ماصدقت خبر طيران عالشامية واشوه لقيته وخذيت 3 انواع(الي بالنيله +الورد+الصبار) وفي بالاعشاب وفي واحد لونه احمر بس ماثبت على شنو وهذي صورتهم..

والحين بقولكم عن تجربتي:

انا لحد الحن الي جربته اهوا النيله لان اهوا اشهر نوع فيهم وهذي صورته..

وهذا شكله من داخل لونه يشوق وملمسه جنه طين ..ذكرني بطين الغزو اهي اهي

اول استخدام لي كان غلط لان غسلت فيه جنه شور جل يعني ما مداني استفدت منه بس الغسله الثانية لا حطيته على جسمي لمده 5 دقايق او اكثر وفركته شوي شوي وبعدين حطيت بالليفه شويه صابون مغربي وفركته.

والنتيجه:

حسيت بنعومه جسمي وانتعاش..هذا غير النظافه ، وان شاء الله بستعمله بالاسبوع مرتين عشان اشوف نتيجه احسن لان حاطين ان مع الاستمرار يزيل الشحوم الزائده والرائحه الكريهه والخلايا الميته والترهلات والبقع السودا وسواد الابط والفخذين والرقبه ومعالجه تشققات الارجل ويقضي على اليهك(شيطلع هذا ماادري) والصدفية ويستخرج الاوساخ ويخفف دوالي الساقين.

وبس هذا الي حبيت اقولكم عنه

ودمتم بخير وبصحه وعافية :)

تجربتي لكحل الأثمد

السلام عليكم ورحمة الله وبركاااته

اول شي حابه اقول عظم الله اجوركم لضحايا حادثه الجهراء

قال رسول الله صلى الله عليه وسلم:

ان لله تعالى ماأخذ، وله ما اعطى ،وكل شيء عنده باجل

نسأل الله الرحمة والمغفره لروحهم.. والصبر والسلوان لذويهم

والحين ندخل بالموضوع..من فتره وانا ماادري شفيني طاق ابالي ابي رموشي تصير طويله بس مو عارفه شلون!

وانا احوس بالمنتدى لقيت وحده عارضه منتج عباره عن زيوت لتطويل وتكثيف الرموش وحاطه تجارب البنات ومشالله كل وحده تمدح بالزيت والنتيجه الي حصلت عليها..جان اقوم واطلب منها هالمنتج واستمريت عليه لمده اسبوع وصج حسيت بفرق بالطول شي بسيط ..واستمريت عليه بس بصراحه ماكنت احطه بصفه يوميه ..

ومن بعدها هم وحده حطت عن جل للحواجب والرموش ماادري اذا تعرفونه اسمه اكرينال وحفظت اسمه عشان اذا رحت الصيدليه آخذه ،جان تقولي اختي ليش تشترينه كاهو عندي ومااستخدمته الا مرتين جنه..خذيته منها وقمت استخدمه وكالعاده اولها اشتط واحطه باليوم مرتين وبعدها قمت احطه بالاسبوع مره :s

المهم ذاك اليوم قريت موضوع عن المستحضرات الي اطول واتكثف الرموش وكاتبين ان اغلبها مضرة للعين الي اتسبب حول والي تسبب ضعف والي ماادري شتسوي..قلت لا يحوشك بروح النظر الله بالخير هالدور بعد حوله :s

قلت انا شالله حادني ليش ماانرد عالطبيعه وعلى سنه رسولنا على الصلاه والسلام منها أجر ومنها استفاده يالله من فضلك ..

واتذكر ان خالتي يزااها الله خير يابتلي من السعودية كحل اثمد واقوم آخذلي شويه واخلطه بالماي واحطه على رموشي وشويه داخل عيني(ترى اذا دخل بالعيون يحرق بس عادي لاتخافون ما منه مضره) بس عيبه الي من المدينه ان لما اتحطونه يتناثر ما يثبت..وذاك اليوم اختي يابت كحل اثمد من الحواي(حواي القادسيه) ولت عنده واحد اسود والثاني احمر..الاحمر يستخدمونه الرياييل اكثر لان مافي لون اما الأسود الحريم يحبون يستخدمونه لان في لون اسود ويصير مثل الكحل..

ويتني اختي جان تقول ترى جربت الي من الحواي وحلو مايتناثر مثل الي عندج..وقتلها دامج مدحتي المره الثانيه لما تروحين ييبيلي منه :P

وماقصرت اخيتي يابتلي منه وخلطت شويه من مال المدينه وشويه من مال الحواي وقمت استخدمه والحين من بعد هالقرقه أخيرا بكتب النتيجه الي شفتها :P
..

1_ طلعتلي رموش يديده :d
2_ الطول حسيت بشي بسيط مو وايد بس لما احط الماسكرا يوصلون لي حواجبي.
3_ انا البس عدسات طبيه كل يوم لان نظري ضعيف ومااحب البس نظارات وتعرفون ان العدسات تسبب جفاف بس مع استخدامي للكحل الاثمد الجفاف خف حتى بياض عيني ردت له اللمعه الطبيعيه مو مثل قبل ناشف .

وبس هذي النتايج الي حصلت عليها من استخدامي للاثمد انا بعد قريت ان يقوي النظر بس يبيله استمرار انا الحين صارلي شهر وشوي بس للامانه مو كل يوم احطه..

وهذي صورهم الي عاليمين اهوا الي من الحواي والي عاليسار مال المدينه